राजधानीमै नक्कली प्रहरीको चलखेल

काठमाडौं । काठमाडौं उपत्यकाका विभिन्न व्यवसायी लगायतका मानिसहरुलाई आफूलाई प्रहरी बताउँदै अनुचित प्रभावमा पारी आर्थिक लाभ लिएको अभियोगमा एक जना पक्राउ परेका छन ।

काठमाडौं टोखा नगरपालिका–८ बाँनियाटार बस्ने रामेछाप खाँडादेवी गाउँपालिका वडा नं. ६ घर भएका २८ वर्षीय गोबिन्द खड्कालाई बिहीबार प्रहरीले पक्राउ गरेको हो ।

उक्त अभियुक्तले विगत २ वर्षदेखि प्रहरीको सञ्चार सेट जस्तो देखिने र हेण्ड वाकिटकी सञ्चार सेटहरु बोकी ट्राफिक प्रहरीको यूनिफर्मको रेनकोट, प्रहरीको टिसर्ट, नेमप्लेट लगाई रातको समयमा रात्रीकालीन व्यवसाय संचालन गर्ने स्थानहरुमा गई व्यवसायीलाई अनुचित प्रभावमा पारी आर्थिक लाभ लिएको भन्ने विशेष सूचनाको आधारमा महानगरीय अपराध महाशाखाबाट खटिएको प्रहरी टोलिले उनलाई पक्राउ गरेको बताइएको छ ।

उनको साथबाट २ थान सञ्चार सेट, १ थान गोबिन्द खड्का लेखिएको नेमप्लेट, नेपाल प्रहरी लगायत अन्य सुरक्षा निकायको जस्तो देखिने यूनिफर्महरू, २ जोर बुट, १ थान मतदाता परिचयपत्र, १ थान सिठि, बा.७८ प १६२ नम्बरको मोटरसाइकल, १ थान सवारी चालक अनुमति पत्र र ४ थान विभिन्न ब्राण्डको मोबाइल बरामद गरेको प्रहरीले जनाएको छ ।