युद्धको संगीत-कविता
–बसन्त बोगटी
ओ दुनियाँ !
ब्युँझ र स्वयंलाई
तयार गर ।
जहाँ
यसबखत
धर्ती–प्रकृतिका
सुन्दर गर्भहरु
बलात्कृत छन !
श्रम, पसिना र रगतहरु
दण्डित छन !
भविष्यहरु
अन्धकार भित्र
थुनिएका छन !
नदिहरु उकुसमुकुस छन ।
युद्धको संगीत
सत्ताको पर्खाल छेडेर
टाढा–टाढासम्म बजिरहेको छ ।
लाखौं–लाख मान्छेहरु
आगोका फुलको माला बोकेर
युद्धलाई पर्खिरहेका छन ।
विश्व ब्रह्माण्डमा
अर्को कठोर समय र संघर्ष
चलिरहेको छ ।
निश्चय नै
यो नविन उथलपुथलको
संकेत हुनुपर्छ ।
नव शिषुको
जन्म बेला जस्तै !
एउटा नँया युगको
स्वागत गर्नुछ !